جينا نبي نشخص ونشري لنا جيب
يعجبك في وصفه ولونه وزينه
وسيع والتكييف مايلحقه عيب
على المراتب كلها موزعينه
منين ماجيته تشوف التعاجيب
يصلح مع اهل البر واهل المدينه
وقفت استشير اهل القنص والتجاريب
سنين معهم جيب ومجربينه
قالوا رهيب الجيب مابه عذاريب
لاشك ماتقدر على بانزينه
قلت السواه وقال بعض الاصاحيب
حله بسيط انصحك بدل مكينه
ديزل الياعبيت مايوجع الجيب
توصلك عشرة من هنا للمدينه
قلت اشهد انه راي مظبوط ومصيب
وبدلت له ديزل وشفت الغبينه
أنا اشهد انه يرفع الضغط ويجيب
كل الهموم الباليات الدفينه
ان جيت اطوف وناطحتني هباهيب
عيا يزود وزاد عندي حنينه
تقول يسحب من ورى بالكلاليب
حتى التريله حطتن في يمينه
وان جيت وسط طعوس حمر نبانيب
ماتسمع الا صياح صوت المكينه
يلحقني الدخان ياوي من طيب
اعدم علي ثياب واشيا ثمينه
ومن يوم زل اشتا وجينا اللوهيب
خرب المكيف ليتنا بايعينه
وكونت باسبابه علاقة اجانيب
علاقة مع كل الاجانب زينه
هندي وبنقالي وتركي وابوعريب
وحتى الفغاني للعشا معاملينه
تبي الصراحة كل مايوفر الجيب
بين الورش واهل القطع دافعينه
عليك باللي يانطلق كنه الذيب
ولو دست له قوة سبق نور عينه
مصنع باليابان جوده وترتيب
لكزس ومسئول الوكاله ظمينه
اليامشى في مشيته كبر ياذيب
وكل الملا تقل مهم معجبنه
انواره كريستال مثل المشاهيب
ازرق زينون يحرق نظر ناطحينه
وزيكه يشابه رشرش بالرعابيب
لمعة ذهب في جيد مضوي جبينه
حتى المرايا بالجوانب محاديب
يسحر اليانطح نظر عاشقينه
واليا اعترض يكذب العين تكذيب
في وقفته عز وشموخ وسكينه
وفي داخله شاشه لبعض المطاليب
تحدد لك الموقع الياضعت وينه
انا اشهد انه يطرب القلب تطريب
بزفلت والا بالطعوس الدفينه
ان عشت والله لو غزى راسي الشيب
لشريه لو طالت علينا سنينه
هذا هواي ومطلبي والمكاسيب
وان مت ماسقته تراها غبينه
الأربعاء يوليو 22, 2009 8:23 am