قصائد في القنص

ياللي طلبتـم نبـذةٍ مـن قصيـدي
عن واقع المعقول لا أنقص ولا أزيد
أنـا غرامـي وأنبساطـي وعيـدي
تفريعة القرناس بأرضٍ بهـا صيـد
لا شطب الصيحـان روس الزبيـدي
والعشب جاء له بالمثانـي عناقيـد
والبدو مـا يبـدى لهـم بالشديـدي
تسعين ليلة مـا حكـوا بالمواريـد
لا شك حب الطيـر شـارك عيالـي
ولو ما أتسلى بالولع كيف أبا أعيش
والله ماني عن غلا الطيـر سالـي
لو نطعمه من بارد الخبـز والعيـش
ولو كان للخـارج نشـد الرحالـي
وندفع على شانه ضريبه وبخشيـش
ما ضاع عند الطير ماهو بمخسـار
لا صار وقت الطير ماهـوب هابـي
والطير حبـه دق بالقلـب مسمـار
من يوم أنا فـي عنفـوان الشبابـي
قلبي يحـب الطيـر والطيـر بـوار
خـصٍ ليـا لـد النظـر للعقـابـي
تركض وراه وتقل ترميـه بحجـار
لو شاف نسره كن بالخـرج دابـي
ينسـى الجمايـل ويتنكـر تنـكـار
نفسـه قـزازه قابلـه للخـرابـي
ياما على دربه تجـاوزت الأوعـار
وأصيح وأومي له وهو ما شقابـي
ماني مسود لحيتي لو غـدت شيـب
ولا ني مغير بأسود الصبـغ شيبـي
لا عاد لا عاشق ولا نـي بخطيـب
حقي من الخفرات حاشـه نصيبـي
البيض مالي من وراهـن مطاليـب
مالـي بهـن لـو جوّدنـي بجيبـي
وطرد الهوى مابه ملامة ولا عيـب
ليا صار بحـدود الشـرف مايعيبـي
وأنا غرامي رفقة الطيـر والجيـب
وشوف الحباري وقـع ولا هريبـي
ومد النظر فـي نايفـات المراقيـب
وقص الأثاري مع جنـاب الشعيبـي
مـع الرجـال مكمليـن المواجيـب
ما ارافـق الا كـل رجـلٍ نجيبـي
العشق مالي فـي مجالـه وظيفـه
مسلمه للـي يبـا العشـق تسليـم
هـواي لا عديـت راس المنيـفـه
والطير صايـم وأخويايـه شغاميـم
أنا علـى المقنـاص قلبـي يرفـي
فتره ونرجـع يـم أهلنـا مناكيـف
بديـار لفـروق الحبـاري تلـفـي
جنوب من حزم الجلاميـد وطريـف
الطير هو غايـة مرامـي وشفـي
أقـدره تقديـر الأجـواد للضـيـف
من كبر قدره شايلـه فـوق كفـي
وأرعاه تسع شهور بالقيض والصيف
قلبـي مولـع بالصقـور القواطيـع
من عرفتي للعلـم هـذي طبوعـي
اللي على بيض الدواغـر هواليـع
لا فرعوهـن للهدد عقـب جوعـي
بأرضٍ بها غيـر البذيـرة طواليـع
قفرٍ بها بيـض الدواغـر ارتوعـي
لا شافهن طير السعد عقـب تطليـع
هذي تكوبـر لـه وهـذي تقوعـي
بأرضٍ بها روس الزبيدي مصاليـع
ما دوجت فيهـا الغنـم والنجوعـي
قفـرٍ يداعبهـا نسيـم الذعـاذيـع
فيها غمير العـام مثـل الزروعـي
هـذا هوايـه يـا بعيـد المراميـع
حب الولع معلـق بقلبـي ولوعـي
مادام انا بالسوق لا أشري ولا أبيـع
قنعان بالمقسوم مـا نـي بشوعـي
ودنيـا الفنـاء خليتهـا للطماميـع
لا حصل ستر الحال منهـا قنوعـي
ولعت قلبـي يـا ابراهيـم توليـع
وذكرتني دوري مع الطيـر هـزاع
وحب الطيور هوايـةٍ مالهـا ريـع
إلا الوناسه مـع طويليـن الأبـواع
يوم الولع ينعـش قلـوبٍ مواليـع
والصيد مادونـه حوامـي ومنـاع
تلقى الجوازي بالصحاري مخاضيـع
والبر فيه اشكال من كـل الأنـواع
واليوم ماحتـى نشـوف الجرابيـع
يم الديار اللي بهـا صيـد وإسبـاع
مقناص بس نضيع الوقـت تضييـع
نقفي ونقبـل بيـن وديـان وتـلاع